Published on Thu, 04/28/2011 - 07:59
കോഴിക്കോട്: എന്‍ഡോസള്‍ഫാന്‍ നിരോധത്തിലെ കേന്ദ്രനിലപാട് ഇന്ത്യയുടെ മാനുഷിക മുഖം വികൃതമാക്കിയെന്ന് മുസ്‌ലിം യൂത്ത്‌ലീഗ് സംസ്ഥാന പ്രസിഡന്റ് കെ.എം. ഷാജി. ലീഗ് ഹൗസില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.
ഈ പ്രശ്‌നത്തില്‍ കേരളത്തില്‍നിന്നുള്ള കേന്ദ്രമന്ത്രിമാര്‍ മൗനം വെടിയാനുള്ള സമയമായി. മനുഷ്യപക്ഷത്ത് നിലകൊള്ളാനും എന്‍ഡോസള്‍ഫാന്‍ നിരോധത്തിന് കേന്ദ്രസര്‍ക്കാറില്‍ സമ്മര്‍ദം ചെലുത്താനും കേന്ദ്രമന്ത്രിമാര്‍ തയാറാകണം. ഇനിയും പഠനം നടത്തണമെന്ന വാദം പരിഹാസ്യമാണ്. നിരര്‍ഥകമായ വാദങ്ങളാണ് കേന്ദ്രത്തിന്‍േറത്. എന്‍ഡോസള്‍ഫാന്‍ ദോഷമല്ലെന്ന് പറയുന്ന മന്ത്രിമാര്‍ പൊതുജനങ്ങള്‍ക്ക് മുന്നില്‍ അത് സ്വയം ഉപയോഗിച്ച് തെളിയിക്കാന്‍ സന്നദ്ധരാകണം -ഷാജി ആവശ്യപ്പെട്ടു.
മുഖ്യമന്ത്രിയുടെ ഉപവാസവും എല്‍.ഡി.എഫ് ഹര്‍ത്താലുമെല്ലാം ഇരകളെ മറന്നുകൊണ്ടുള്ള രാഷ്ട്രീയ കളികളാണെന്നും ഷാജി ആരോപിച്ചു. സംസ്ഥാന ജനറല്‍ സെക്രട്ടറി അഡ്വ. എന്‍. ഷംസുദ്ദീന്‍, സി.കെ. സുബൈര്‍, എം.പി. അബ്ദുസ്സമദ് എന്നിവരും വാര്‍ത്താസമ്മേളനത്തില്‍ പങ്കെടുത്തു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ